Joseph@外地遊記: 201510 南法秋遊第十日 - Menton (芒通)，Eze (伊茲)

今日一出門口，太陽、藍天終於出返黎啦！好開心呀！今日既早餐，我地係酒店附近既麵包店，買左麵包係車上食！

終於好天啦

係後面呢間買麵包

我食呢個蘋果酥

9:30 開車前往芒通小鎮 (Menton)，中途又會經過摩洛哥山上既路，我記得禽日係山上有個位可以睇見成個摩洛哥及地中海既景色。今日咁好天，我地專登再去呢個位睇下同影相。一去到，望落去，電影中出現既藍天碧海摩洛哥，終於返左黎啦！呢個先至係我心目中既「蔚藍海岸」！

蔚藍海岸既摩洛哥

咁靚, 影返張打卡相

我地大約 10:40 去到芒通，芒通係一個連接意大利邊境既小鎮，又以出產檸檬著名，鎮內建築物以檸檬黃色為主，每年二月更會舉辦檸檬節，所以芒通有檸檬小鎮之稱。我地係海邊條路 (Promenade du Soleil) 泊好車，跟住沿沙灘行，睇住真係蔚藍色既地中海，真係好靚。我地係沙灘影相同玩下，都差唔多玩左一個鐘！

芒通海灘邊

呢 D 餐廳個景好正

芒通海灘

芒通

係沙灘向舊城區方向行，首先去到一個市場 Marche Couvert，市場後有一個小市集 (Les Halles) ，只係早上營業，不過好細！跟住我地沿窄窄既斜路同樓梯上去教堂 (Basilique Saint Michel)，上到去，係教堂前古舊建築中間，可以清楚看見地中海，兩邊既建築物及地下就好似畫框咁，而中間就係美美既地中海景色風景畫！每個人第一眼見到都嘩嘩聲！

Marche Couvert 市場

檸檬

芒通既建築物

芒通小巷都好有特色

係建築物中既海景,好似畫咁

Basilique Saint Michel 教堂

專賣檸檬產品既專門店, 有檸檬酒, 檸檬汁

仲有唔同味既檸檬果醬

今日午餐我地預訂左一間真正係意大利邊境位置既米芝蓮二星餐廳 Mirazur。我地由芒通揸車過去，係餐廳門口有個路牌指住前面就係意大利，我地更係要去影張相啦！Mirazur 除左係米芝蓮二星餐廳，佢連續兩年 (2014及2015) 係 World's 50 Best Restaurants 排第十一位，真係唔惹小！

餐廳門口有個路牌指去意大利

米芝蓮二星餐廳 Mirazur

入到餐廳，四周都係大大幅玻璃，一面食一面可以欣賞芒通小鎮景色，再加上暖暖既陽光，非常舒服既環境。我地叫左€55 既午餐，我地問有咩食，個侍應話係 Surprise Menu，只係問我地有冇對咩食物敏感。首先黎左三個餐前小食，紅菜頭啫喱上面有小小羊芝士、一條細細條做型特別既沙甸魚仔配芒通檸檬及黑布甸蘋果馬其龍 (Macaroon)。三種餐前小食都細細份，但食入口又好清新！

餐廳內無敵既景色

有溫暖既陽光照入黎

佢有部機即製有氣水

沙甸魚仔配芒通檸檬

黑布甸蘋果馬其龍

紅菜頭啫喱配羊芝士

餐前小食後，就黎左個自家製麵包，外型已經好吸引。跟住侍應仲比左張紙我地，原來係主廚寫既有關麵包既詩，可以見到呢個主廚真係好尊重食物。個侍應跟住拎支油出黎，好鄭重咁介紹呢支係主廚出品既檸檬橄欖油，並以芒通既檸檬製成。我地試左用麵包點呢隻檸檬橄欖油，好似檸檬洗潔精既香味，唔係太接受到，都係塗牛油比較好味！

自家製麵包及檸檬橄欖油

跟住就黎左道魚生薄黃瓜片配柑橘醬，呢個魚生食得出好新鮮，個柑橘醬又令到成道菜有清新既氣色！

魚生薄黃瓜片配柑橘醬

而個湯就變左一個粟米糊，杰杰既糊入口真係有粟米湯既味，其實叫佢糊都唔夠黎形容佢杰既程度，我覺得可以叫佢係膏。呢個粟米膏再配上一 d 脆脆既薄片，口感好新奇特別！

粟米糊

主菜有兩款，一款係魚，另一款係雞。個魚煎得好香脆及滑，不過因為之前既菜式太特別，反而主菜就冇左驚喜，平平無其。個雞就仲搞笑，碗內有一個好似雞冠既物體，我心諗雞冠都食得架咩？原來係菇黎既，佢切到形狀好似雞冠啫。跟住碗內有一塊白色好珍貴既雞肉，應該係一塊雞胸肉，食入口，好滑，有雞味，不過呢個未就係我地平時食既白切雞整法。我地平成食白切雞，一大塊一大塊放入口，呢度就得一塊仔，慢慢續少續少切黎食，我覺得成件事好好笑。可能廚師整到雞胸肉都可以咁滑咁有雞味，法國人覺得好驚奇。但對我地香港人黎講，簡直係家常便飯。

煎魚

雞

我地既主菜

甜品以一隻好特別既碟盛著，係一個橙雪芭配杏仁泡沫，面層仲有一塊脆脆，食入口有幾個層次。最後以黑橄欖白朱古力，咖啡塔餅為總結。其實成餐除左個主菜，全部都有驚喜，加上個咁無敵既景，我覺得都值得黎食一次既！

橙雪芭配杏仁泡沫

黑橄欖白朱古力，咖啡塔餅

我地大約食到 2:35 ，上返車，跟住就揸車去意大利，個邊境完全咩都冇，普通一條路駛過去，入左意大利都未必知。係意大利落車，搵意大利路牌影張相，跟住就返去法國啦！

呢條路就係法國同意大利交界, 就咁行過去就得架啦

意大利生果檔

係意大利有路牌指返去法國

由芒通揸 40 分鐘車，去到一個叫伊茲 (Eze) 既山城。呢個山城有個好特別既熱帶園庭 (Le Jardin Exotique)，園座依山城興建，內裡除左有花，仲擺設好多藝術品。我地首先係去左 Fragonard 香水工廠參觀，入場免費，都幾好玩，不過我地因為參觀左香水工廠，所以冇時間去熱帶園庭。

伊茲山城

Fragonard 香水工廠

Fragonard 香水工廠內

伊茲山城內

今晚冇指定去邊食飯，記得禽日去康城時，途日見到一個超大既購物中心，好多車排晒隊入去，我地就決定去呢個新開張既 Polygone Riviera 購物中心。我地 7:00 去到，購物中心仍然超多人。呢個購物中心係戶外既，似高級版 Outlet，不過呢度仲有戲院，酒吧及春天百貨公司 (Printemps)，高級好多。我地係購物中心既一間叫 Le Comptoir 食晚餐，呢間野裝修好摩登，大大隻金色波波燈，好有特色。食物方面，佢有少少混合泰式風味，都幾得意！