201510 南法秋遊第五日 - St. Remy (聖雷米)，Les Baux-de-Provence (雷伯鎮)，Aix-en-Provence (埃克斯)

今早又去前日朝早去過既麵包店 Marie Blachere Boulangeriea 食早餐。今次試左個蘋果撻，好好味，不過最好味始終係牛角飽。

Marie Blachere Boulangeriea 麵包店

蘋果撻

我地既早餐

我地執好行李，放晒上車離開阿維儂。一撻車，架車個錶版出左句 "Key Battery low Replace soon"，即係條車匙開始冇電。因為我地仲有八日要揸呢架車，驚真係無啦啦會撻唔到車，所以決定去阿維儂 TVG 火車站既 Hertz 換車匙電。去到 Hertz 佢話要換另一架車比我。我條匙冇電咋喎，唔駛換車咁大件事呀！但佢地都係話要換車。我冇諗過要換車，所以架車個油缸唔滿，我又要揸架車去搵油站入油。去到油站，所有指示只有法文，我搞黎搞去都搞唔掂點樣入。算啦！去返 Hertz，由得佢計我油錢！搞一搞換車就花左一個半鐘。不過好彩既係佢 Upgrade 換左架 Citroen C4 Picasso 比我地，呢架車高級好多，有全 LED 錶板， GPS 導航系統同後波鏡頭。

出左 "Key Battery low Replace soon" 既字

換左呢架 Citroen C4 Picasso

我地 11:15 先去到今日第一個目的地 St. Remy (聖雷米)。聖雷米係梵高晚年居住既地方，雖然佢只係短短住左一年時間，但好多著名作品都係呢段時間於聖雷米畫既，因此令到聖雷米呢個小鎮成為南法其中一個熱門旅遊據點。我地係街邊搵左個錶位泊好車，然後開始聖雷米追蹤梵高足跡之旅！

首先我地去 Musée Estrine - Présence Van Gogh 梵高藝術中心，去到個接待處職員話 12:00 關門食飯，下午先再開。佢又好老實同我講館內冇咩真跡，大部份既真跡都去晒世界不同地方既博物館。佢咁講，我就決定唔入去睇啦！

梵高藝術中心

聖雷米市內

聖雷米市內

於聖雷米遊客中心，可以拎到一張聖雷米地圖，地圖上標示左市內梵高作畫既地方，大家可以跟住行呢條梵高之路(Van Gogh Walk)。

其中一個梵高作畫既地方

大約 12:15 ，又係食午餐既時候，我原本打算去一間米芝蓮餐廳 La maison Jaune Restaurant 食，但去到冇開門。我地四圍睇下，入左去一間叫 La Cassolette 既餐廳。一個午餐，包頭盤、主菜及甜品，只係€14。我頭盤叫左份沙律、主菜牛扒配焗薯、甜品心太軟，環境，食物質數及賣相都非常好，呢餐簡直係超值！

冇開門既米芝蓮餐廳 La maison Jaune Restaurant

La Cassolette 餐廳

環境好好

我地叫唔同既頭盤

我既主菜黎啦

主菜同甜品

飯後就揸車去 Maison de santé Saint-Paul 精神病院，呢間精神病院就係梵高死前住地方。講到精神病院，大家唔駛驚，而家已經冇精神病人住架啦！入去精神病院要比入場費，入到去可以見到好多梵高畫作既實景，仲有梵高當年住既房間。所有梵高作畫既地方都有塊 "Les paysages de Vincent van Gogh" 既標記，如果時間夠多，可以行埋由精神病院到聖雷米市中心個段路，因為有非常多梵高作畫標記。

Maison de santé Saint-Paul 精神病院外梵高作畫既地方

Maison de santé Saint-Paul 精神病院內有梵高自畫像

梵高銅像

呢度係當時種野既地方

精神病院內既教堂

精神病院內

梵高間房

呢幅畫係梵高跟呢個景畫，而家都冇咩點變

梵高係呢度畫呢幅畫

畫中既樹，應該係呢棵

大約 3:00 離開聖雷米，揸車去有石頭城之稱既 Les Baux-de-Provence (雷伯鎮)。途中我地經過一個小酒莊 Mas de la Dame，普羅旺斯最出名係「玫瑰紅酒」(Rose)，去到呢間酒莊，試左支 Rose，好好，所以買左兩支走！

小酒莊 Mas de la Dame

買左枝酒

雷伯鎮位於二百幾米既山脊上，附近四周都係奇形怪狀既石灰岩石。入到城內，城內多用石黎建築，係一個好特別既山城。我地沿城內石路一路向上行，兩旁有好多精品店及咖啡室，以前因地理環境而建成既易守難攻山城，而家變城吸引遊客既亮點。上到城既最高處係莱博城堡遺跡 Château des Baux de Provence 既入口，入去參觀要比錢，所以我地冇入去。我地反而走去城內一間咖啡室，坐低睇下風景，飲杯咖啡，仲嘆！

雷伯鎮

附近全係呢 d 奇怪石頭

雷伯鎮內

有舖頭行下

雷伯鎮

嘆下咖啡

雷伯鎮旁有個好好好特別既美術館 Carrieres de Lumieres，呢個美術館設於石灰山洞內，用天然既白色石灰牆作營幕，將著名藝術家既名畫及雕塑投到牆上，再配上音樂，另大家欣賞名作時有不同既感受。不過我地因為之前太嘆，去到門口已經 5:00，剛過了最後入場時間。我地唯有聽日再專登揸車過黎啦！

我地由聖雷米揸一個鐘車，去到另一個普羅旺斯既大城市 Aix-en-Provence (埃克斯)。我地會係埃克斯住兩晚，我地租左一間兩層兩房既民宿 (Apartment)，住 Apartment 有個唔好處係冇接待處，我地要用 Whatsapp 打電話去約 check-in 。Apartment 位於舊城區既小巷內，小巷口有條大鐵柱唔比車入，我地將架車停係條柱前等個 Apartment 主人Quentin。十分鐘左右佢就黎到，佢用張卡掃下路旁一部機，條大鐵柱就降底左，架車就可以入去條小巷，好勁呀！

我地就停左係度等屋主

去到 Apartment 樓下，冇電梯，要拎住大行李上幾層樓！Apartment 好大，有兩層，樓上有一間房、大露台及浴室，樓下有另一間房、另一個浴室、客廳及開放式廚房。Quentin 同我地介紹下間 Apartment 既設施，樓上個浴室有個好大既落地玻璃門，沖涼時可以拉低個捲簾。佢叫我地唔好大力拉個簾，會跌落黎！到左夜晚，我沖涼時一拉，個簾就跌左落黎！頂！我唔係好大力咋喎！我睇下個簾，原來佢只係用雙面膠紙黐塊布簾上去個窗簾桿，咁梗係易跌落黎啦！我用我既辦法黐番上去，之後就住就住咁用！另外佢又同我地講唔好同時開太多電器，因為舊城區電力唔夠，好易跳掣，跳左掣就要叫電力公司去開返！我地都唔會用太多電器，點知聽日整早餐時就中招.... 跳左掣！

Apartment 就係呢幢屋既三樓

開放式廚房

客廳

上二樓既樓梯

我間睡房

睡房內既浴室

有個大露台

Quentin 交帶完，我地又係附近停車場泊好車，跟住就落街食野。我地落到 Apartment 樓下，旁聽就有一間叫 Le Carrefour Bar 既餐廳仔，見佢有蠔食，我地就入去試下。我地先叫左一打 Mont-Saint Michel 既生蠔，一打只係 €19，呢隻生蠔好新鮮，好甜美！跟住我地再叫左青口，鴨胸、雞肉沙律及意粉。除左生蠔超好食，其他食物都..... 算 ok 啦！

Le Carrefour Bar 既餐廳仔

我地既主菜