201510 南法秋遊第四日 - Fontaine de Vaucluse (碧泉村), Gordes (葛德山城), Roussillon (魯西隆), Apt (阿普特)

今朝一早食酒店食埋禽日買個麵包做早餐，然後大約 9:00 出發去 Fontaine de Vaucluse (碧泉村)，車程大約 40 分鐘。碧泉村位於壯麗既山谷內，我地去到大約 10:00 ，太陽仲未照到入黎，成個碧泉村有少少陰寒，而經過碧泉村既 River Sorgue 索格河只係一條好普通既河啫！網上個個人都講到呢度好靚，呢一刻我又唔係好覺囉！

碧泉村

條河冇咩特別

右下角有架水車，比較有少少睇頭

一場黎到，點都四圍行下既，我地見沿河既左岸有條路可以去到泉口 (La Source de La Sorgue)，冇咩做所以去睇下！去到泉口，因為水流不大，所以只見到一個好大好大既洞！我地沿路行返去，因接近中午，太陽照射到村內，嘩！同今朝既景色完全係兩回事！陽光下清澈見底的翠綠河水閃閃發光，真係好似綠寶石一樣。因為有太陽，今朝既陰寒亦都散去，係陽光下好溫暖舒服，碧泉村原來真係好靚！

沿呢條河行去上流

當行山做下運動

泉口

個洞口其實好鬼大，有個人行到好近，可以對比到好大

陽光照到碧泉村，原來真係好靚架

有陽光，當堂唔同晒

碧泉村既中心地帶

我地玩到 11:30 就揸車去 Gordes (葛德山城)，葛德山城被稱為天空之城，成個城既建築都以石頭建成，好有中世紀色彩！入城前大家記得揸去城外 D15 公路既展望台，可以遙望整個山城。

係 D15 展望台遙望葛德山城

山城前係一片田園

入到城，於城內城堡前既停車場泊好車，然後係城中心既 L'Encas 餐廳食午餐。呢間餐廳有個午市套餐，頭盤+主菜或主菜+甜品，每位 €16.5，主菜我地叫左個吞拿魚扒，及一個牛扒，大大碟跟薯條，好抵食！

 L'Encas 餐廳

 L'Encas 餐廳內好多人

有隻窗睇下風景

我既主菜！吞拿魚扒

我地叫左既其他主菜同甜品

飯後係葛德山城行個圈，睇下鎮上的教堂，石頭建築，再去城邊眺望普羅旺斯田園風景。因為葛德山城唔係太大，大約半個鐘就行完。

葛德山城中間既小廣場

廣場旁既城堡

附近仲有間教堂

成個山城都係窄窄既小路，好有特色

通過呢條路，就去到城邊

可以欣賞普羅旺斯田園景色

南法既路牌都好靚

揸 15 分鐘車，就去到另一個有紅色山城之稱既 Roussillon (魯西隆)。魯西隆位於紅色既赭石礦脈上，當地人以此來建屋，所以整個山城都係深深淺淺既紅色建築物。係山城旁有條 Le Sentier des Ocres (紅土步道)，要收入場費，成個山頭既泥土都係紅色，係上面行好似行緊天然既紅地毯，好得意架！

魯西隆紅色山城

魯西隆紅色山城

魯西隆紅色山城

紅土步道

紅土步道

大約 4:40 左右，我地就行完魯西隆，見時間尚早，所以揸車去 20 分鐘車程既 Apt (阿普特) 古城。可能太夜，去到阿普特，店舖都開始關門，成個鎮冷清清。我地行左半個鐘，好冇癮，所以決定返去亞維儂一帶食晚餐。

阿普特市內

我覺得呢個係阿普特一個特色景點

由阿普特返去亞維儂大約一小時車程，當過左亞維儂機場，接近亞維儂市時，我地見到有一個大型商場叫  CAP SUB Centre Commercial，場內有戲院、老佛爺百貨公司 (Galeries Lafayette Avignon)、餐廳。啱晒啦！我地可以行下老佛爺先，然後搵間餐廳食飯，食完就返酒店！

CAP SUB Centre Commercial

行百貨公司就唔駛講啦！不如講下我地食咩！我地見到有一間叫 Le Patacrepe 既餐廳，食燒扒及漢堡，好似幾好，就入左去試下。睇下個餐牌，有個鵝肝漢堡。好新奇，我未食過，我真係未食過！所以叫左黎食。個鵝肝漢堡係一塊飽，上面放左塊漢堡扒，再上面有塊同漢堡扒一樣大既鵝肝。三樣野一齊放入口，又真係好奇特，塊鵝肝好香，再配漢堡扒有少少既焦香味，而塊飽又吸收番個油膩感，好特別，係堅好味既！

Le Patacrepe 餐廳

鵝肝漢堡

牛扒

一人一份，好飽