201510 南法秋遊第九日 - Saint-Paul-de-Vence (聖保羅山城)，Monaco(摩納哥)

今朝冇食早餐，直接 9:00 揸車去有藝術山城之稱既聖保羅山城 (Saint-Paul-de-Vence)，車程只係 45 分鐘左右。聖保羅山城入口前有一個農夫市集，今朝唔食早餐就係打算黎到市集先食。但去到市集，得兩檔，一檔賣乾果，另一檔賣湯加撻，我地既早餐就係呢個熱湯加撻。檔主好好人，見我地飲晒湯，免費添一碗比我地，呢 d 就係人情味！

聖保羅山城

農夫市集賣乾果既檔口

早餐就幫襯左呢個姨姨買湯

聖保羅山城係建於公元九世紀既古老山城，據說每年有三百多日都係陽光普照，但我地今日遍遍遇上唔好天。古城依山勢興建，於城中心廣場有一座建於1850 年既大噴泉( Grande Fontaine )，係舊時山城既水源。聖保羅山城被稱為藝術山城，係因為城內有好多好多獨立藝術家開設既小畫廊及工作室。係古舊窄窄既山城內，慢慢體會及欣賞藝術品或山城古老建築，呢種就係小山城吸引既地方！

山城城牆入口

地下花花路好靚

路邊有好多花

買左呢隻松露鵝肝

中心廣場大噴泉

城內最高既鐘樓

山城內小路

有不同藝術品

城牆

聖保羅山城外有一間米芝蓮推介餐廳，叫 Le Vieux Moulin。呢間餐廳環境帶有法國郊外農村風格，但又不失高級感。午餐沒有套餐，我地每人叫一份主菜及一份甜品，餐牌仲有句字標榜全店甜品都係自家製，好似好勁咁喎。主菜我叫左個海鮮炒長通粉 (Penne with Seafood, Squids, King Prawns, Mussels and Scallops)，價錢 €23，呢個粉份量好大，最勁係有鑊氣，海鮮又爽甜，好好味！另外其他人叫左鴨胸 (Grilled duck breast fillet with lavender honey sauce, pan-sauteed seasonal)，價錢 €26.5，呢個其實都幾好，不過唔夠第一日係亞維儂 Fou de Fafa 食既鴨胸好味。甜品我叫左心太軟 (Chocolate soft cake and ice-cream)，價錢 €8.5，另外佢有個無花果金寶 (Figs Crumble and Almond ice-cream)，價錢 €10.5，因為第一次見無花果做既金寶，好特別！係米芝蓮推介餐廳食飯，比米芝蓮有星既餐廳少左份拘謹，食都食得輕鬆好多。

Le Vieux Moulin

餐廳內

海鮮炒長通粉

鴨胸

餐前麵包，中間個醬好好食，另外我地既甜品

午飯後，我地揸左一個鐘車去摩納哥 (Monaco)，摩納哥位於海邊，我地由山上既公路駛落去時，有一個位置可以居高臨下睇晒成個摩納哥及海灣，不過因為今日唔好天，所以又係灰濛濛，我地都冇停車影相。黎到摩納哥，又係見唔到電影中常見既藍天碧海摩納哥，好失望！

一場黎到，雖然唔好天，都要行下既！我地泊好車，先去全城最豪既酒店 Hotel de Paris (巴黎大酒店) 同賭場 (Le Grand Casino) 門口影張相。唔知大家記唔記得 Iron Man 2 內，Tony 就係摩納哥蒙地卡羅賽車時受襲，而喼神裝甲亦係呢度登場。係巴黎大酒店對面就有隻 Iron Man 企定定係度比遊客影相。

灰濛濛既摩納哥

巴黎大酒店

賭場

Iron Man

開左燈既巴黎大酒店

落晒雨真係冇咩心機行，我地去左巴黎大酒店對面一堆名店行下，我再行左去大教堂睇下，跟住就返去攞車走。走時用架車行左一段蒙地卡羅賽車賽道，算係行過下咁啦！

大教堂

大教堂

呢個位睇地圖係法國同摩納哥交界

山上望返去巴黎大酒店

返到尼斯都差唔多夜晚 7:30 ，今晚又搵到街邊位泊車，好好彩！唔知係唔係天氣問題，冇咩胃口，據聞法國有不少不錯既越南餐廳，口淡淡想去食碗越南粉。即時上網搵到係火車站附近有間越南餐廳，行去要大約 20 分鐘。王生唔想行，所以我地分開各自搵食。行到去間越南餐廳竟然冇開門，咁唯有再行下睇下有咩食。我地沿尼斯最旺既購物街 Avenue Jean Medecin 行返去酒店方向，行行下個胃口又好番好多。

經過超級市場買左生果

購物街 Avenue Jean Medecin

Avenue Jean Medecin 上既教堂

我地行返去馬賽納廣場 (Place Massena) 附近，見到有間餐廳叫  Villa d'este，勁多人，兩層都座無虛席，所以一定唔會差啦！咁我地就走左入去。睇見場內氣氛，胃口返晒黎，我地叫左一份龍蝦螺絲粉同一份青口，另外叫左兩支可樂，因為之前餐餐飲酒，今餐整支冰凍可樂，仲加一片檸檬。一入口，爽晒！份龍蝦螺絲粉係半隻完整龍蝦，足晒料。份青口仲勁，超級大碟，配一個番茄汁底，好好食，呢個青口係成個法國之旅食到最好味既青口！

Villa d'este

好爽既可樂

龍蝦螺絲粉

青口