Joseph@外地遊記: 201510 南法秋遊第二日

早上由馬賽機場行出黎，吸一口南法既空氣。嘩！冇老作架，真係好清新！我地先去 Hertz 租車，我預訂左一架 Peugeot 308 SW 或 Ford C-Max 呢個級別既棍波車，去到辨好手續就自己去停車場拎車。今次佢比左架 Ford C-Max 我，都幾大架，四個大行李都可以放車尾行李位內。我冇同 Hertz 租 GPS，我地靠手機下載左既法國 GPS App，個名叫 Navmii。呢個 App 係離線既，唔使用網絡數據。好準，好得，最正係免費！

清晨的馬賽機場停車場

Ford C-Max

放得晒我地四個大行李

Navmii GPS

我地首先直駛去 Avignon (亞維儂) 市內，車程一個小時左右。我地將架車停係亞維儂 Les Halles 中央街市既停車場，呢個街市裡面有幾十檔小店，有賣肉、菜、芝士及鮮花等，仲有幾檔地道熟食檔。我地係街市行左個圈，影下相，跟住就行去 Place de l'Horloge (時鐘廣場) 既方向。

Les Halles 中央街市

外國既蔬果店都靚過人既

唔買都影下啦！

我地由時鐘廣場開始，先行下 Rue de la Republique (共和大道)，呢條共和大道係亞維儂最旺既購物大道，兩旁有很多商店，大型連鎖店及超級市場。

Rue de la Republique (共和大道)

我地行到一半，就走入去旁邊一間叫 La Maison Nani 既餐廳食午餐。我地係門口見到佢個餐牌有一個套餐 (Formule du jour)，€14.9 包 Today's special、甜品及咖啡，所以走入去。入到餐廳，裡面已經座滿人，好好彩剛剛有一張四人檯。我地問下侍應生今日套餐既 Today's special 係咩，佢話冇套餐，但冇講點解。咁我地只好叫餐牌既野食，呢度一個主菜大約 €11-€18，我地叫左牛肉他他、漢堡、牛扒及 Risotto (意大利飯)，個侍應生以為我地唔知牛肉他他係生牛肉，同我地解釋，我地話 ok ...ok.....。雖然我個樣唔西，但都成日食好西架 (好多西餐架) ！知道咩野係牛肉他他架！

La Maison Nani

點左呢種有氣既蘋果酒 (Cider)

好大碟架

我地就係叫左呢四碟

我地四個人分呢四碟食物，個牛肉他他賣相已經好靚，入口比到我期望既水準，好得！牛扒及漢堡大大份，跟好多薯條，味道中規中距，呢個價錢，收晒貨啦！意大利飯就唔太大碟，味道都可以既！其實呢間餐廳位於非常方面既位置，環境幾好，食物又唔差，我覺得簡簡單單食個午餐係唔錯既選擇！

食完飯，我地開始亞維儂半天遊。首先我地沿共和大道行去 Place de l'Horloge (時鐘廣場)，時鐘廣場可以話係亞維儂中心地帶，廣場有好多餐廳及露天咖啡廳，中間仲有一個旋轉木馬，不過今日唔係太多人，唔夠熱鬧。大家要留意廣場旁既 Hotel de Ville (市政廳) 及 Theatre (歌劇院)，廣場既名係因為市政廳上 14、15 世紀既時鐘塔。歌劇院就係另一個人氣建設物。

Place de l'Horloge (時鐘廣場)

時鐘廣場既木馬

Hotel de Ville (市政廳)

Theatre (歌劇院)

穿過時鐘廣場，我地就去到 Palais des Papes (教皇宮)，呢個教皇宮好勁架。1309 年，當時天主教主教 Clement V，因鬥爭離開梵蒂岡，遷到亞維儂教皇宮，前後一共有七位主教居於此。教皇宮係世界最大既哥德式宮殿，內裡極盡奢華，不過經法國大革命後，裡面大部份地方已經被摧毀了。教皇宮入場每位 €11，我地買左教皇宮加 Pont St. Benezet (聖貝內澤斷橋)入場套票，每位 €13.5。係教皇宮頂有一間小咖啡店，行到腳仔軟，可以坐低飲杯咖啡。

Palais des Papes (教皇宮) 門口

Palais des Papes (教皇宮)

教皇宮內

呢個廳好靚

塔尖

教皇宮上眺望亞維儂市

教皇宮前廣場

大家可以係呢個地方睇風景

教皇宮既咖啡店，要係右下個窄巷上去

係教皇宮慢慢行都行左一個半鐘，離開左教皇宮就走左去旁邊一個小山丘上面既 Rocher des Doms (岩石公園)。對我地呢幾個剛剛坐完長途機既人黎講，行上呢個公園都幾吃力！上到去見到個公園冇咩特別，公園中間有個湖，湖上面有鵝有鴨，湖邊有間小食店，因為公園內既樹好茂盛，遮左大部份陽光，個公園都有些少陰沈沈。我地走到去向住（Rhône）隆河既一邊，嘩，呢邊好好多，高處睇見隆河及河上既 Pont St. Benezet (聖貝內澤斷橋)，頭先咁辛苦行上黎呢個公園，見到呢個景，總算抵返晒！

公園內既小湖

Pont St. Benezet (聖貝內澤斷橋)

由公園向隆河呢邊行返落山，可以行一小段亞維儂城牆，亞維儂整個城區就係被呢個 14 世紀中古城牆包圍住，全長多達五公里。

亞維儂城牆

亞維儂城牆其中一個入口

行完城牆就去到聖貝內澤斷橋既入口，因為我地之前買左入場套票，所以唔駛再比錢入去。聖貝內澤斷橋興建於1171年到1185年，於 1668 年被洪水沖毀，22 座橋拱只餘下現在 4 座。橋既設計帶有濃厚既中古色彩，其中一座橋墩有一間小聖堂，再加上係一座斷橋，所以非常特別，並成為亞維儂標誌性既地標。

橋上，唔講真係唔知

橋上睇既河景

都係去返岸邊先影到條橋

係教皇堂附近有條街叫 Rue de la Balance ，係一條開有不少特色小店，係呢度行下，好舒服，好寧靜！

街上小店

七彩既馬賽皂

頭先冇去行到教皇宮旁既 Cathedrale Notre Dame des Doms (聖母院大教堂)，我地返去補行番，不過我搵唔到個入口，好奇怪！所以只係出面影張相。

Cathedrale Notre Dame des Doms (聖母院大教堂)

今晚既晚餐我一早預訂左係 Tripadvisor 網站，亞維儂餐廳排行榜排第一既 Fou de Fafa。我訂左 6:30，咁我早少少 6:00 去到，佢竟然真係未開門，我地只好係街再遊蕩下，6:30 先返黎。

Fou de Fafa 一間唔係好大既餐廳，入面得六張檯左右，裝修好法國家庭感覺。餐廳得兩個人，一個係個主廚，另一個係招呼客人既女主人。女主人好好人，用英文形容係 Warm welcome，中文點形容呢，如果用「熱烈歡迎」我覺得太過左，因為佢又冇去到「熱烈」呢個有少少嚇人既程度。呢度真係令你有係家中食野果種溫暖、放鬆及舒適既感覺。

Fou de fafa

餐廳內

女主人介紹我地開左一支南法既 Rose，好清新！我地每人都點一份前菜及一份主菜，冇點甜品。頭盤我點左個湯 (Squash soup with truffle oil and poppy seeds)，個湯好香濃，帶有松露香，好好味！另外佢地有叫其他頭盤，有蘋果沙律及三文魚他他，佢地都話好得！

飲 Rose

我地四個唔同既頭盤

主菜我叫左個鴨胸 (Pan-fried duck breast with a creamy mushroom sauce, stir-fried vegatables, crushed potatoes)，一碟有成四片厚切鴨胸，睇見個樣同聞到個香味，我已經估到一定唔差，食入口，真係好好味，肉汁好豐富，外層煎到好香，我真係未食過咁好味既鴨胸。食完呢個鴨胸，我對法國人煮鴨好有信心，搞到我黎緊幾日係唔同餐廳都不時點了鴨胸，不過呢度既鴨胸係最好食既！

羊肉

鴨胸

只係食頭盤及主菜已經好飽，四個人一共只係€127，好抵食。我極力推介大家係亞維儂一定要黎 Fou de Fafa 食一餐，Fou de Fafa 係今次成個法國旅程，我覺得最好既餐廳，比米之蓮既一星、二星更加好食，不過記得一定要訂位！

飯後我地慢慢行返去 Les Halles (中央街市)攞車，今日由中午泊到晚上八點幾，成八個鐘有多，泊車費只係 €10.9，比香港平好多。

我地一連三晚會以亞維儂為基地，再去 Nimes (尼姆)、Fontaine de Vaucluse (碧泉村)、
Gordes (葛德山城)、Roussillon (魯西隆)及Apt (阿普特) 等地。我地選擇左一間唔係亞維儂市內既酒店 Novotel Avignon Nord，佢位於亞維儂東北面，十分鐘車程左右。呢一帶好特別，唔係住宅區，係一個購物區，有好多餐廳、酒店、商店及大型商場。Novotel Avignon Nord 價錢唔貴、房間又大，我地有車，住遠少少都唔係問題。