201803 冬遊瑞典丹麥

挪威、瑞典、丹麥、芬蘭及冰島，五個北歐既國家，好多人會一次玩三個以上，但因為我只去玩十五日，所以要取捨一下。我今次選擇左去瑞典及丹麥，因為搵到平機票去哥本哈根，所以丹麥係首選。另外要選多個國家，全因為哥本哈根旁邊就係瑞典，所以就比瑞典入選左今次旅程。

瑞典丹麥有咩玩，係編行程前，我只係知丹麥有曲奇餅同 Lego，丹麥首都哥本哈根係全球最快樂城市。瑞典就有 IKEA，而斯德哥爾摩有個病症叫斯德哥爾摩侯群症。

買左機票後，開始編行程，我先知道原來瑞典係三月都有北極光睇，所以立即將瑞典既行程偏重去睇北極光。而丹麥就會揸車去唔同既城市觀光。

交通

先講講瑞典，成個行程我地只係去斯德哥爾摩及瑞典北面基律納 (Kiruna) 一帶。係斯德哥爾摩會用公共交通工具，而北面基律納因為冰天雪地，而當地既公共交通工具又唔多，所以我覺得都係租架車方便好多。

而夜晚追極光，我地可以自己揸架車去睇，咁就可以慳番唔駛跟好貴既極光團。等極光時，如果太凍又可以走上車避寒。唯一要注意係冰天雪地下駕駛安全既問題。好好彩！我地去到租車公司時，佢比左架四驅車我，加上雪軚，係雪地上真係如履平地。去到丹麥，我地會去不同既城市，除左哥本哈根市內，其他地方我地都係租車自己揸去。

金錢

本來都諗住去到機場及火車站用提款卡取瑞典及丹麥既當地貨幣，但上網搵下，發現原來瑞典及丹麥唔興用現金，佢地咩都可以用信用卡付款。出發前我都有少少懷疑，係大城市只用信用卡都講得通，去到瑞典北面既 Kiruna 同 Asbiko，係唔係真係可以全用信用卡呀？

當我去到 Kiruna，我唔信邪，走去提款機拎左少少錢傍身，點知原來真係全瑞典及丹麥都可以只用信用卡，我後來係離開瑞典之前一日，夾硬用左未郁過既現金。不過後來去到丹麥，終於有一間小食店唔收信用卡，佢只係收手機付款，應該係好似支付寶既野。結論始終都係完全唔需要用現金，全用信用卡最好。

行程

• 25/03 哥本哈根 (Copenhagen)
• 26/03 基律納(Kiruna)，阿比斯庫 (Abisko)
• 27/03 納爾維克(Narvik)
• 28/03 基律納(Kiruna)，Jukkasjärvi 
• 29/03 斯德哥爾摩 (Stockholm)
• 30/03 斯德哥爾摩 (Stockholm)
• 31/03 斯德哥爾摩 (Stockholm)
• 01/04 奧登斯 (Odense)
• 02/04 Legoland Billund
• 03/04 奧登斯 (Odense)
• 04/04 奧登斯 (Odense)，哥本哈根 (Copenhagen)
• 05/04 赫爾辛格 (Helsingor)
• 06/04 哥本哈根 (Copenhagen)
• 07/04 哥本哈根 (Copenhagen)
• 08/04 哥本哈根 (Copenhagen)