Joseph@外地遊記: 201609 瑞士第七日 - 勞特布龍嫩 (Lauterbrunnen)，米倫 (Murren) ，茵特拉肯(Interlaken)

本來今日去少女峰，但因為知道今日天氣唔好，所以禽日已經上左去。咁今日完全冇野做，所以係旅館食早餐時，就拎下旅館內介紹附近景點既小冊子，研究下有咩地方天氣唔好下都可以去。

天氣差左好多

食早餐

歐陸式早餐

好多人黎少女峰都會去埋佛斯特 (First) 行山，由格林德瓦 (Grindelwald) 坐纜車去佛斯特，再由佛斯特行去 Bachalpsee 湖，沿途可以欣賞雪山湖泊既景色，來回約兩個鐘，係好熱門既路段。由佛斯特返去格林德瓦，可以選擇玩 First Flyer, Mountain Cart 及 Scooter bike 落山，好似幾好玩同刺激架。不過我睇左 First 既天氣預測，今日會整日落雨，去唔到！

咁係山另一邊既勞特布龍嫩 (Lauterbrunnen) 亦係另一個熱門既地點，勞特布龍嫩又叫瀑布鎮，鎮後面有一條好高既瀑布，都幾有特色。而去到勞特布龍嫩仲可以坐纜車去山上既無車小村 - 米倫 (Murren)。最緊要係天氣預測話呢兩個地方只係陰天，間中有小小雨。

我地 9:45 先出車去勞特布龍嫩，二十分鐘左右就到達。勞特布龍嫩係一坐位於夾谷中既小鎮，兩邊都被高聳垂直既山包圍，山上有大大小小既瀑布不停流落黎。我地停左車，跟住朝最大既瀑布方向行。去到瀑布底，原來有路可以上去瀑布後面，然後係高處透過瀑布觀賞勞特布龍嫩小鎮。

勞特布龍嫩

準備上瀑布

上緊瀑布

由瀑布上睇返勞特布龍嫩小鎮

勞特布龍嫩小鎮

瀑布後

係勞特布龍嫩只係上去瀑布玩都搞左個半鐘。大約 12:00 左右，我地就出發去米倫，去米倫先要坐纜車去 Grutschalp，再轉小火車去米倫，車程大約半個鐘。米倫原來係呢一帶地勢最高有人定居既小村，位於海拔 1650 公尺既山上，成條村人口唔多，所以好寧靜。由村望去對面既群山，就係少女峰 (Jungfraujoch)，艾格峰 (Eiger) 及僧侶峰 (Monch)，如果天氣好，係呢度欣賞及拍攝呢三大峰，會比禽日去既少女峰觀景台更好！

坐纜車去 Grutschalp

轉小火車去米倫

對面就係大群山峰

午餐我地去左小村既中心廣場一間小食店，叫左瑞士式漢堡及熱狗，點解叫瑞士式呢？因為個飽面有個瑞士國旗既十字！呢間小店得老闆一個人，我見佢會同不同顧客傾下計，好熱情咁！

午餐小食店

瑞士式漢堡及熱狗

食完午餐，我地慢慢係呢個寧靜小村行下，好多當地居民都係自己花園種左好多好靚既花，淨係睇花園，影下相都好開心！係村既另一邊有另一個纜車站，呢個站係上去另一個山峰 - 雪朗峰 (Schilthorn)，呢個峰好出名，因為好多好多年前既 007 電影就係呢度拍，係站裡面佈滿好多有關 007 既野。我地冇上到去雪朗峰，因為車站有部電視，播緊即時山上面既影像，上面天氣好差，白茫茫一片，咩野都睇唔到！我地係小村四圍行同影相，逗留左差唔多三個鐘，之後我地就坐返小火車及纜車返去瀑布鎮，然後揸車返旅館。

米倫小鎮內

老婆有個同事兩公婆剛好今日都到左格林德瓦，而今日係農曆八月十五中秋節，人月兩團圓既日子，所以約左佢地今晚一齊揸車去茵特拉肯(Interlaken)食飯，食完飯再去另一個剛好又到左茵特拉肯既朋友既 Serviced Apartment 食月餅賞月。

老婆同事今日上左少女峰，佢地 Whatsapp 話上到去真係白茫茫一片，山都見唔到。好彩我地禽日上左啫。係等佢地由少女峰返黎既時侯，我地就係格林德瓦既大街行下商店，去咖啡店飲咖啡及食件蘋果批。

回到茵特拉肯

下午茶

蘋果批

5:30 終於同佢地見面，佢地一上車，我就直接揸去茵特拉肯。茵特拉肯英文叫 Interlaken，我明顯係講湖啦，因為茵特拉肯位於兩個湖既中間，所以就叫 Interlaken。見時間仲早，我地就先去其中一個湖既湖邊行下。

茵特拉肯其中一個湖

湖邊

行完湖，跟住就揸車去左 Interlaken OST 火車站，泊好車就去搵食。Inerlaken 有兩個火車站，另一個叫 Interlaken-West 西火車站。我以為逢火車站附近都好旺，一定好多野食，點知我錯左。係 Interlaken OST 附近得個商場仔，有間超級市場，我地入去行唔夠五分鐘就到 7:00 關門時間。我地出返去條街，沿 Interlaken-West 方向行，冇咩餐廳！

Interlaken OST 火車站

行左十幾二十分鐘，去到一個大公園及賭場附近，終於比較旺。我地走左入去一間叫 Des Aples 既餐廳，坐係半露天既檯，向住公園。瑞士菜最出名係芝士火鍋，之前得兩個人，驚份量太大，食唔晒，但今日有四個人，終於可以試下。另外亦叫左瑞士薯餅 Rosti 及一個薄餅。我之前已經知道芝士火鍋唔會好似我地港式火鍋咁，有好多好多不同既食物比你食，芝士火鍋係得一鍋芝士及一籃麵包，你只係用麵包點熱既芝士食。因為冇期望，所以送上桌時就冇失望。不過食入口，我又覺得幾好味，鍋芝士落左酒，酒香減少左芝士膩既味道，真係唔錯！瑞士薯餅 Rosti 係一塊煎左既薯餅，上面放左火腿、芝士、洋蔥及煎蛋，亦都係幾好既一味菜。