Joseph@外地遊記: 201510 南法秋遊第十二日 - 香檳之路：Reims (蘭斯)，Épernay (埃佩爾奈)

今日我地會去著名既法國香檳區，一早 8:30 去火車站既 Bonne Journee 買左個麵包食，然後就去 Hertz 租車。因為我地冇行李，所以租左架細車 Ford Fiesta。估唔到我地黎法國十幾日，呢架係第四架車！

火車站

早餐食麵包

租左呢架 Ford Fiesta

搞好租車手續，攞埋車都已經 9:15。我地預訂左 11:00 去參觀 G.H. Mumm 香檳酒莊，由巴黎去蘭斯 (Reims) 要一個半小時，其實時間只係剛剛好，所以我沿途都以剛唔超速既速度行車。好好彩剛好 10:55 去到。

不如先介紹下咩係香檳區，香檳區位於巴黎西北面，因為土壤及降雨量既關係，令到該地區非常適合釀製香檳酒。法國法律更指定只有香檳區出產既酒先可以叫香檳，其他地區出產既只可以叫氣泡酒。香檳迷於香檳區一定要去蘭斯 (Reims) 及埃佩爾奈 (Épernay) 呢兩個鎮，因為出名既 Moët & Chandon、Dom Perignon、Krug、G.H. Mumm 及 Venve Clicquot 都來自呢兩個鎮。

我地先去位於蘭斯既 G.H. Mumm 香檳酒莊，參觀香檳酒莊有三個價錢，三個價錢都會有專人帶領去參觀酒窖，並講解釀製香檳既方法。三個價錢唯一分別係最後品酒既酒，最平 €20，可以飲一杯 G.H. Mumm Cordon Rouge 最平既香檳，另外 €28 就有一杯 Cuvee 既香檳，最貴既 €39，就有一杯 Blanc de Blancs (100% Chardonnay) 及一杯 Blanc de Noirs (100% Pinot Noir)。我地兩個人一人選最平，一人選最貴，咁就可以試下平酒，又可以試下貴酒。

G.H. Mumm 香檳酒莊

好大支香檳

介紹唔同大細既香檳名稱

試酒前，我地先參觀左地下酒窖，酒窖面積非常之大，所有通道都要比個街名，冇名真係有可能會盪失路。成個參觀過程大約35分鐘，第一次參觀酒窖既，真係好新鮮，好有趣！

落去地下酒窖

地下酒窖

等轉樽既香檳

講解香檳既歷史

舊式釀香檳既木桶

到重頭戲試香檳，我地由酒窖上返去地面，安排去到一個品酒區，有位著住禮服既法國高大男士，用高貴既手勢倒出一杯杯晶瑩剔透既香檳，香檳幼細既氣泡係杯中慢慢升起，睇見已經好開心！我先飲 Blanc de Blancs (100% Chardonnay)，唔會太甜，入口乾身，但講唔出同平時飲既普通香檳有咩分別，貴左係邊？跟住飲平既 G.H. Mumm Cordon Rouge，嘩！兩隻酒一齊飲黎比較，即刻分到隻貴野真係好飲好多，冇一種苦澀味，好香醇！

倒緊香檳呀

帶我地落去酒窖既領隊

我果兩杯貴香檳

品酒中

買左支帶返屋企

本來一個鐘既參觀，我地因為慢慢品酒，又去買下香檳，搞到差唔多玩左兩個鐘，大約 1:00 先離開。我地預約左 2:00 參觀位於埃佩爾奈既 Moët & Chandon 香檳酒莊，而家淨返一個鐘時間，要揸車去又要預時間食午餐，時間好緊迫。

因為真係冇咩時間，我地係埃佩爾奈市中心一間麵包店，買左麵包上車快快食左就算。跟住揸車去 Moët & Chandon ，又行錯少少路，搞到遲左 10 分鐘到，錯過左介紹 Moët & Chandon 歷史既環節。

埃佩爾奈市中心

午餐係呢間買麵包

先講講參觀既價錢，又係三個價錢，包參觀酒窖同品酒。三個價錢既分別又係在於飲唔同既酒。最平 €22，有一杯最平既 Moët Impérial，€28，有一杯 Moët Impérial 同一杯 Moët Rosé Impérial，最貴既€35，有一杯 Grand Vintage 同一杯 Grand Vintage Rosé。我地又係選擇一個最平加一個最貴。

Moët & Chandon 香檳酒莊

香檳之父 Dom Perignon 銅像

因為我地錯過左介紹 Moët & Chandon 歷史既環節，直接就去睇左個幾分鐘既介紹影片。然後就有專人帶我地去酒窖，酒窖內同 G.H. Mumm 既差唔多，不過就更加大。

Moët & Chandon 酒窖

呢幾支咁多塵，應該都有番咁上下歷史

去到酒窖既盡頭，有一間間房，房內就係品酒區。入到去有兩位西裝友係度倒香檳。我地 €35 既朋友，係有一杯 2006 既 Grand Vintage 同一杯 2006 既 Grand Vintage Rosé，有 Vintage 香檳，仲要平過 G.H. Mumm，好抵呀！呢兩杯 Vintage 一跟 Impérial 一齊飲，即刻高下立見，貴既 Vintage 真係貴得有道理！參觀完兩間香檳酒莊，我已經飲左四杯香檳，飲到醉醉地！

有係品酒時間

兩杯 2006 Vintage 香檳

我又飲兩杯

酒窖有個好舊既招牌

唔同年份既 Vintage

冇腳既杯仔

金色特別版

浴缸版

黎個總結，我覺得參觀酒窖，兩間都係睇差唔多既野，所以搵一間去睇已經好夠。而品酒方面，Moët & Chandon 出 Vintage，嬴晒啦！另外係賣酒既地方，Moët & Chandon亦多左好多特別版既酒、精品及酒杯等售賣。所以我覺得如果黎香檳區，走去 Moët & Chandon 參觀酒窖及品酒就夠，跟住去其他小型香檳酒莊試下酒，就仲好！

Moët & Chandon 係位於埃佩爾奈既香檳街 (Avenue de Champagne) 上，呢條街有好多其他大大小小既香檳酒莊，好多香檳迷都走去小香檳酒莊內，一對一跟香檳酒莊既人一面傾酒，一面品酒。我地都入左幾間去睇下！

香檳街 (Avenue de Champagne)

小酒莊 Champagne A. Bergere

另一間酒莊 Champagne Collard-Picard

見太陽仲未落山，我地揸車去左附近既葡萄園，影下即將變成香檳酒既葡萄。

經過條橋時見到條河好靚

葡萄園

由埃佩爾奈揸車返去蘭斯，係蘭斯聖母院 (Cathédrale Notre-Dame de Reims) 附近泊左車。跟住就行左去蘭斯歌劇院 (Opéra de Reims) 一帶，呢度係蘭斯最旺既地方。我地見有間餐廳叫 Cafe du Palais，內有好多人，估佢都唔會太差，所以就係呢度食晚餐。餐廳有八十幾年歷史，店內四周都放滿不同既藝術品，好似一家小型藝術館。後來上網搵，呢間餐廳仲係米芝蓮推介既餐廳。