201510 南法秋遊第六日 - Arles (亞爾)，Aix-en-Provence (埃克斯)

今日係夏令時間完結，個 iPhone 識自己校慢一個鐘，好聰明！我地又可以瞓多一個鐘，好鬼嘆！今朝起身，諗住用 Apartment 個廚房整早餐食，開個焗爐焗熱個麵包，用電磁爐煎蛋同火腿，開左洗衣機洗衫，忽然跳電掣！全屋冇電！跌窗簾同跳電掣，中晒屋主叫我地注意既野！我地唯有照食凍凍地既火腿飽做早餐。跟住我 Whatsapp 屋主 Quentin，點知另一位屋主 Michel 覆我，佢叫我試下 check 下個電錶掣。其實我已經出左去攞車，咁我未返上樓睇下，啪下電錶掣上既掣都冇咩反應，咁我同 Michel 講，我地出去啦，叫佢自己上黎整啦！最後佢真係要聯絡電力公司先搞番好。

早上的埃克斯

我地 10:00 去返禽晚入唔到既 山洞美術館 Carrieres de Lumieres，入場貴 €12 一個人。禽日講過，呢個美術館設於石灰山洞內，用天然既白色石灰牆作屏幕，將著名藝術家既名畫及雕塑投到牆上，再配上音樂展現出黎。我地呢段時候，剛好係展出達文西、米高安哲羅既作品，有大家熟悉既蒙羅麗莎、最後晚餐、大衛像等。入到山洞真係好似入到奇幻既地方，牆身、石柱、地板全都係放大左既藝術家作品。投出石雕作品時，好似真係一座座真品係眼前，好神奇既感覺。大家四圍行完，影完相，其實可以搵個地方坐定定，舒舒服服咁欣賞牆身不繼轉出黎既名作。成個展出大約一個鐘，因為太精彩，完全唔覺唔覺我地就真係乖乖咁睇左一個鐘！

山洞美術館 Carrieres de Lumieres

山洞美術館 Carrieres de Lumieres

美術館內

美術館內

美術館內

美術館內

美術館內

美術館內

美術館內

美術館內的影片

我地下一站係去另一個小鎮 Arles (亞爾)，我地去到市內，發現好多路都封左，原來剛剛舉行完馬拉松比賽。我地將架車泊係旅遊中心附近既街邊入錶停車場，因為今日係星期日，所以唔駛比錢泊車，不過一落車有個人過黎問我地攞錢，我地驚唔比錢佢，佢會搞我地架車，所以比左幾蚊佢！

Arles (亞爾),又有木馬

市中心既廣場 Place de la Republique

廣場旁既教堂 Paroisse Saint Trophime

我地先步行去亞爾既 Les Arenes (圓型競技場)，呢個競技場同 Nimes (尼姆) 個圓型競技場好似，不過比較小型些少，而呢度都冇咁多人，我地只係外面影下相，冇比錢入去睇，跟住順便望下旁邊既 Theatre Antique (古羅馬劇場)。

Les Arenes (圓型競技場)

圓型競技場

圓型競技場

黎亞爾其實最主要又係跟隨梵高既足跡，梵高既名作「星空下的咖啡館」既咖啡館其實就位於亞爾，呢間咖啡館而家真係改左名叫「梵高咖啡店」(Le Cafe Van Gogh)，而外牆亦油左同幅畫一樣既黃色。

梵高咖啡店 (Le Cafe Van Gogh)

梵高既名作「星空下的咖啡館」

今日既午餐，我地去左 Tripadvisor 內亞爾餐廳排名榜第一位既 Café Factory Republique，呢間係一間小小餐廳仔，店內有四型五張檯，店外有幾張露天座位。一去到門口，老闆好熱情咁招呼我地。呢間野個老闆真係超熱情，佢不停去唔同檯同客人傾計，有兩個美國黎既女仔同佢傾到超開心。佢又同我地講佢老婆呀，仔女呀! 我地叫左牛扒同魚食，食物質數係中上既。但我覺得佢拎到 Tripadvisor 第一位，唔係因為食物，係因為佢既熱情！

Café Factory Republique

午餐

南法好多呢隻薰衣草熊仔

專賣薰衣草製品既名店

我地係亞爾市內行左一陣，跟住揸車去亞爾市外既梵高橋 (Van Gogh bridge)，呢條橋係梵高時常畫既橋，所以都好出名！

梵高橋 (Van Gogh bridge)

梵高畫既梵高橋 (Van Gogh bridge)

我地 2:40 左右真係揸車離開亞爾，大概半個鐘車程，我地到左 Alphonse Daudet's Mill (都德風車) 睇風車。我地跟 GPS 行，去到一個小村既盡頭，車唔可以再入，我地就咁泊架車係路邊，然後行上山，大約行十五分鐘就去到風車既所在地。都德風車因為都德小說而出名，咩係都德小說？我都唔識，我只係知個山上面有座老式風車，好靚！我四圍望下，見好多人走時行另一個方向，原來係 D33 公路旁有個大停車場，停車場一行上黎，就係風車呢度，我地好笨呀！泊到鬼死咁遠，仲行餐死先到！

行呢條路去睇風車

Alphonse Daudet's Mill (都德風車)

Alphonse Daudet's Mill (都德風車)

係風車附近，大約十分鐘車程，有一間比較大型既酒莊 Château d'Estoublon ，酒莊面積非常之大，除左有店舖試酒同賣酒，仲有小教堂同餐廳。呢度除左有酒之外，原來橄欖油都好出名。

 Château d'Estoublon 酒莊

酒莊內小教堂

小教堂內

有得試酒

南法 Rose

影下酒桶

影下葡萄

時間尚早，我地搵下附近有冇超級市場。王生同佢部電話搵到一間好大既家樂福，咁我未跟住佢指示揸架車去。揸下揸下，我估都要大半個鐘先去到，不過去到見個空外停車場冇咩車，個招牌又冇開燈。去到門口，頂！今日唔開門！我望下附近好似有個機場，我拎部 iPhone，睇下我而家係邊，原來我地係馬賽機場旁邊。

一場黎到機場附近，我就揸車去機場，打探下我留左部相機係飛機單野。去到機場，我走去報失處，我同佢講幾日前我黎報失，你同事比左個電郵地址同電話我，個電郵冇人覆，個電話打唔通，咁點算！個職員睇左個電郵地址同電話，佢話呢個錯架，跟住佢係一本簿上面搵左個用手寫既電郵地址比我。佢叫我寄電郵去呢度問。上返車之後，我即時寄電郵過去，好快就有人覆，原來呢個係德國機場既報失中心。我比左我部相機既資料佢，例如型號，顏色同序號。佢好快覆返我話搵到部機，叫我去返慕尼黑機場攞。但係我回程唔會再經過慕尼黑機場，佢後來話免費寄返比我！太好啦！我叫佢直接寄返去香港比我！失而復得！好開心！

大約 7:00 返到去埃克斯，泊好車就去搵食。我地去左 Cours Mirabeau (米拉波林蔭大道)，呢條街係埃克斯最旺既地方，全長 440 米，街道兩旁有好多餐廳及名店。王生行到去 Les Deux Garcons (雙侍咖啡館) 門口話食呢間，雙侍咖啡館開業於 1792 年，而埃克斯出生既名畫家保羅．賽尚（Paul Cezanne）時常係留連係雙侍咖啡館，所以出名。呢種有名氣既餐廳，我本來只係打算下午坐低，飲杯咖啡，感受下文人氣息。不過王生出到聲話係度食晚餐，就食啦！我地叫左個晚餐，有頭盤、主菜及甜品，€28。頭盤我叫左鵝肝，主菜就係牛扒，甜品叫左布甸，預左呢種餐廳係名多於實架啦！

Les Deux Garcons (雙侍咖啡館)