Joseph@外地遊記: 201510 南法秋遊第八日

2015/10/27

201510 南法秋遊第八日 - Cannes (康城)

今日早上會去昂蒂布 (Antibes)，而下午就去康城 (Cannes)。9:00 左右出發去攞車，上左車，開車轉左一個彎，街上既途人對我地做手勢，再指指我地架車，好似架車有事喎。我地停埋一邊，落車睇下，左後車軚插左釘，爆軚！

早上既馬塞納廣場

爆軚

我上網搵下附近有冇 Hertz，尼斯火車站及海邊都有一間，海邊果間比較近，行十分鐘左右就到。我一個人行過去，入到 Hertz，得一個中年女員工，佢招呼緊另一個客，咁我企係一邊等左一陣。到我啦！我同佢講爆左軚，佢都只係借個電話我打去 24 小時支援熱線。電話接通左，我講左我個情況，佢問我係邊間租架車，我覆佢話馬賽機場，佢竟然將我個電話轉去馬賽機場 Hertz，馬賽機場果個人又話叫我打去支援熱線，好混亂！搞咩呀！我同舖頭果位中女職員講，佢接左個電話，講左一輪法文，跟住收左線。佢幫我再打去支援熱線，再講我個情況，佢又好勞氣咁對住個電話講左一輪法文，跟住又收左線。佢同我講對方唔知搞咩，話一個鐘之後先覆我。佢叫我不如揸架車去尼斯機場間 Hertz 搞，去尼斯機場有七公里路程，我架車爆左軚點，揸到咁遠呀？佢仲叫我寫信去投訴，反影佢地人手不足，幫唔到我。我見佢都冇晒計，咁只好返去架車度。我係 Google Map 睇下去火車站間 Hertz 只係一公里左右，再睇下條軚既狀態，我估慢慢行都可以去到既！我地好小心，好慢咁揸去，沿途好多人不斷向我地示意架車爆軚，後面架車個司機仲落車走黎同我地講，法國人真係超熱心！

好不容易終於去到尼斯火車站，時間亦去到 11:00。呢間 Hertz 又係得一個職員，不過好彩唔係中女，係個幾靚既後生女！後生女又真係比較好相與，佢好快咁話換另一架車比我，而爆軚就要收我 €224。我份旅遊保險包租車，所以可以返到香港問保險公司攞返。今次換左同一型號既車比我地，不過又升級左去自動波。個好相與女職員仲選左架車齡比較新既車比我地。因為爆軚，搞左三個鐘。我地只好取消去昂蒂布，直接去康城。

換左呢架車

架車個行車錶版都唔同左

1:30 去到康城，天色好差，灰濛濛，仲有少少雨。跟平時電影上見到藍天碧海既康城好大分別，搞到個人既心情都麻麻地！我地是但去左一間叫 Caffe Roma 既餐廳食午餐，都係食下沙律、意粉同薄餅，天氣差、心情差所以食而無味！

午餐既 Caffe Roma

因為落雨，我地重點只係去左節慶宮 (Palais des Festivals et des Congres de Cannes)，即係康城影展行紅地毯既地方。旁邊既星光大道 (L’Allée des Etoiles-du-Cinéma)，行埋去海邊睇下遊艇。跟住團友們要去睇名牌手袋！真係好快咁行左一個半鐘，我地就攞車，再揸去舊城區山上既聖母院 (Notre-Dame d'Espérance)，諗住睇下康城市景色，不過又係因為落雨，唔好睇既！