今次既自駕遊，我地同 Sixt 公司租車，但係 Sixt 租車公司係市中心冇分店，所以我地叫左架 Uber 車我地去 Sixt。我地本來租架 BMW X1，去到佢比左架比較舊既 Opel Insignia Estate 。另外佢不斷遊說我買全保，因為我有自己既車保，所以我堅決唔買。跟住又叫我買油 (Prepaid fuel)，即係唔駛入滿油還車，價值 KN566，佢話平過去入油。我後來計下，入一缸油 70 公升要 KN708。睇落好似平少少，但佢收 KN566 係再要比 25% 稅，連稅都係 KN708，同我自己入冇分別。但我比佢呃左，買左呢個 Prepaid fuel。唔知點解 Sixt 另外仲收左我 Foreign use 同 Roadside Protection。一，佢比我架車差左，二，又猛遊說我加呢樣加個樣，三，又無啦啦加左我 Foreign use 同 Roadside Protection，我覺得有少少唔老實。
攞左車後，我地揸車返公寓拎埋行李，就出發去奧帕蒂亞 (Opatija)。由薩格勒布 (Zagreb) 去奧帕蒂亞 (Opatija)要兩小時車程，去到 12:00 剛好食飯。之前幾日都天陰陰，離開左薩格勒布 (Zagreb) ，終於放晴啦！
 |
| 奧帕蒂亞 |
 | |
| 奧帕蒂亞教堂 |
 |
| 奧帕蒂亞教堂 |
克羅地亞西北面既伊斯特里亞半島 (Istrian) 係盛產黑松露，所以我地去左一間排名幾高既餐廳 Restaurant Ružmarin 品嘗黑松露菜式。我地叫左黑松露蝦意粉、黑松露牛扒、海鮮意粉及燒蔬菜。兩個黑松露菜都有好香濃既黑松露味，佢地個醬係同一款既。個海鮮意粉整得好乾身，幾好味。呢一餐 KN505 (HK$614)，有黑松露算平啦！
奧帕蒂亞 (Opatija)位處海邊，所有景點都位於沿岸既海濱步道。成條步道有成十幾公里，我地只係於少女與海鷗雕像附近行下。
下午 2:45 ，我地上返車，揸左一小時十五分鐘，到達我地既目的地羅維尼 (Rovinj)。我地先去今明兩晚住宿既地方 House Eufemia Rustico。呢間屋都幾特別，成間屋以白色為主，再以少少金色器具黎點綴，有少少宮廷既氣質。不過，因為所有野都係白色，當仔細睇時，好難時時保持到白雪雪，梗會見到有少少污穢既地方。
羅維尼 (Rovinj) 古城唔係好大，兩三個鐘就行完，不過城內既古屋及彎彎窄窄既小巷，全都係極美既影相位。鐘意影相既就要預多少少時間。
 |
| 古城內最高既聖尤菲米亞教堂 |
 |
| 教堂旁有間咖啡店 |
 |
| 睇住呢個靚景飲咖啡 |
要欣賞羅維尼 (Rovinj) 古城最美既一面，就係要日落時出海，係海上望返個古城。我地去到碼頭，冇咩人，冇咩船，又冇咩遊客，好似冇船出海。咁我地唯有行去古城南面對岸，呢個位都幾好，可以同一畫面有日落，又有古城。
 |
| 日落 |
晚餐我地揸車去左我地公寓屋主介紹既 La Perla Restaurant。呢間餐廳外型幾靚，係一間玻璃小屋。我地叫左湯、海鮮、牛扒等，所有野都好好食。不過我地食得唔係咁高興，因為餐廳內好多人食煙，我見食煙既人同餐廳既人都好熟，應該都係熟客。我地個喉嚨比佢地二手煙搞到好唔舒服，只係想快快食完走人，所以就算食物幾好食都冇用。
晚上回到公寓，夜晚既感覺又唔同早上。
No comments:
Post a Comment