早上我地再到羅維尼 (Rovinj) 古城，發掘禽日仲未影既靚景。行到去聖尤菲米亞教堂 (Church of St. Euphemia)，因為今日係星期日，所以有彌撒，好多人！
午餐我地去碼頭個邊一間叫 Kantinon Tavern 餐廳，呢間餐廳主打本地食材，就算可樂都係冇可口可樂，得克羅地亞既可樂牌子，叫 Cockta。我地叫左魚、意粉及意大利雲吞，食物不錯，價錢四個人食左 KN458 (HK$557)，平！
下午 2:30 我地揸車去另一個附近既城市 - 普拉 (Pula)，車程 45 分鐘。去到普拉，因為星期日，所以好易搵街邊車位泊車。普拉最著名就係古羅馬競技場 (Amphitheatre de Pula)，競技場建於公元前 27 至公元後 68 間，有二千年既歷史。而佢更係保存得最好既古羅馬競技場。
古羅馬競技場入場費 KN50，入到去好自然會同最著名既位於羅馬既競技場比較。羅馬既競技場比普拉既大又高。而普拉既競技場就真係完整好多，起碼佢中央既競技場地仲係度，唔會好似羅馬既得一個個坑。最好既係普拉既競技場好少人，可以慢慢搵靚位影相。
普拉市內除左有古羅馬競技場既遺跡，仲有好多其他古羅馬既遺跡。奧古斯都神廟 (Temple of Augustus)，市政廳 (Gradska uprava Pula)、塞爾吉烏斯凱旋門 (Arch of the Sergii)，威尼斯城堡 (Malo Rimsko Kazaliste) 及羅馬劇場 (Rimsko Kazaliste)。大部份既遺跡都保存得好好，除左羅馬劇場。羅馬劇場只係剩下一幅幅破爛既石牆，基本上係想像唔到本來既外貌。
 |
| 市政廳 (Gradska uprava Pula) |
 |
| 奧古斯都神廟 (Temple of Augustus) |
 |
| 塞爾吉烏斯凱旋門 (Arch of the Sergii) |
 |
| 塞爾吉烏斯凱旋門 (Arch of the Sergii) |
 |
| 羅馬劇場 (Rimsko Kazaliste) |
 |
| 威尼斯城堡 (Malo Rimsko Kazaliste) |
今晚既晚餐本來打算回羅維尼食，但因為想睇下古羅馬競技場既夜景，所以我地上網搵到一間位於普拉既薄餅店 - Pizzeria Tivoli。我地叫左一個沙律，兩個大薄餅。呢度個薄餅係帶少少美式既厚批，但個批底整得好好食，上面又足料，熱辣辣出到黎，唔覺唔覺就 KO 呢兩個大薄餅。埋單四個人 KN140 (HK$168)，嘩！痴線架，平均一人 HK$42，香港茶餐廳都唔得啦！仲要咁好味！
我地回到古羅馬競技場，剛剛日落，個天又未去到全黑，影出黎既相勁靚。我地影左好多相，之後就揸車返去羅維尼。
No comments:
Post a Comment