早餐後我地沿電車路行去耶拉西奇廣場 (Ban Josip Jelačić Square)，再前行經薩格勒布最主要既大街 Ilica 去到 Funicular 纜車站，打算坐纜車上舊城區。呢架纜車係全世界最短途既纜車，全長只有66米，爬升高度30米，行走全程都只係一分鐘左右。我地去到唔知點解佢冇開，旁聽有條樓梯上舊城區，我地行兩分鐘左右就上到去。
 |
| 市內舊式電車 |
 |
| 市內新式電車 |
 |
| 纜車站 |
係舊城區有間失戀博物館 (Museum of Broken Relationships)，裡面收藏左好多失戀朋友既物件，每件物件旁會介紹下個故事，真係幾有趣。例如有個舊既 Nokia 電話，旁邊寫住 "It was 300 days too long. He gave me his mobile phone so I couldn't call him anymore"。
聖馬可教堂 (St Mark's Church)， 一定係薩格勒布既首位地標，獨特既屋頂，由彩色瓦片砌成左邊既克羅地亞徽章及右邊既薩格勒布市徽。一見呢座教堂，立即可以知道係薩格勒布。
係舊城區有另一景點叫石門 (Stone Gate)，以前呢區係比城牆包圍，石門就係城門既出入口。當年一場大火，將附近建築物燒毀，但石門內既聖母像竟然安然無事，因此現在既石門就變成好似小教堂咁存放聖母像。
落返去 Ilica 大街，我地去左水果市場 (Dolac Market)，市場除左有水果、蔬菜賣，仲有不少鮮花及紀念品。我地發現呢度賣既薰衣草香包係全克羅地亞最平既。
 |
| 據說領呔既發源地係薩格勒布 |
今日既午餐，我地去左一間號稱全薩格勒布最好既薄餅店 Karijola Vlaska。呢間薄餅店唔係市中心，所以我地坐電車去，後來我發現係我地住既地方附近有分店。
薄餅店有好多不同味道既薄餅，分35cm 及 27cm 大細。價錢由 KN43 至 KN82 都有。我地叫左三個薄餅加一個沙律。薄餅即叫即製，再係碳爐燒。新鮮熱辣，果然名不虛傳，堅好味！我地其中一個薄餅有火箭菜係上面，佢既火箭菜既味好濃，帶有辛辣味，好特別！後來我係克羅地亞食左幾次火箭菜，都係比平時香港食到既濃味好多。會唔會火箭菜本來就應該係咁既味呢？
午餐後，我地坐電車去薩格勒布火車站，沿火車站對面既大公園，經薩格勒布美術館 (Art Pavilion in Zagreb) 漫漫行返去耶拉西奇廣場 (Ban Josip Jelačić Square)，再返去公寓休息一下，沿路感受下呢個城市！
 |
| 薩格勒布火車站 |
 |
| 薩格勒布美術館 |
晚上 7:30，我地去左一間叫 Gostionica Tip Top 既餐廳。我返黎寫呢編遊記時，已經對呢間餐廳既食物冇晒印象，即係佢唔係難食，又唔係特別好食，正正常常，普普通通咁啦！唔駛專登去試咁囉！
No comments:
Post a Comment